Андижонда Наврўз сайили

- Халқимиз орзу қилган ҳақиқий сайл бўляпти, - дейди меҳнат фахрийси Адолатхон Каримова. – Энг муҳими, дастурлар жонли ва ранг-баранг тайёрланган. Ҳар бир тоифа – ёшлар ҳам, кексалар ҳам ўзлари ёқтирган томоша ва манзаралар билан танишиши мумкин. Неварам дорбозлар ўйинига қизиқади. Ёзги амфитеатрда намойиш қилинаётган дор ўйинларини кўриб катта завқ олдик. Мана шундай сайлларнинг бош ташкилотчиси ва ташаббускори бўлган Президентимизга минг раҳмат!

- 4-синфда ўқийман, - дейди тенгдошлари билан варрак учириш мусобақасида қатнашиб, бир зум тин олган Муҳаммадаюб Аҳмаджонов. – Синфдошларим билан сайлга чиқдик. Баҳорги миллий ўйинлардан фақат варрак учириш ва “Оқ теракми, кўк терак”ни билардим. Бу ерда ҳозир жуда кўп миллий ўйинларни томоша қилдим. Наврўз, барибир, яхши-да!

Вилоятимиздаги қирғиз миллий маданий маркази фаоллари томонидан ўрнатилган ўтов, қардош миллатга хос удумлар намойиши ҳамда куй-қўшиқлар барчада катта қизиқиш уйғотди. Кўргазмага келган томошабинлар биргалашиб куйлаб, қирғизча ўйинларга рақсга тушаётганлигини кўришингиз мумкин.

- Бу йилги байрам дастурлари хилма-хиллиги билан эсда қоларли бўлди, - дейди марказ фаоли, Булоқбоши туманининг Ширмонбулоқ қишлоғида яшовчи Мирзаакбар Қосимов. – Юртимизда турли миллат ва элатлар бирдамликда, иноқ ва тотув ҳаёт кечиришмоқда. Ўзаро ҳурмат, меҳмондўстлик, бағрикенглик каби фазилатлар ифодасини яққол кўриш мумкин. Тинчлик-фаровонлигимизга кўз тегмасин.

Эътиборлиси, байрам сайли меҳмонлари учун якка тартибдаги тадбиркор Ҳасанбой Ҳусанов ҳамда “Шарқ зиёкори”, “Китоб савдоси” масъулияти чекланган жамиятлари томонидан турли адабиётлар савдоси ҳам ташкил этилди.

- Мингга яқин номдаги китобларни сотувга олиб чиқдик, - дейди “Шарқ зиёкори” масъулияти чекланган жамияти Андижон филиали директори Улуғбек Исақов. – Айниқса, болаларга мўлжалланган ҳамда миллий урф-одатлар билан боғлиқ адабиётларга талаб катта бўляпти.

Сайл дастурларини қизиқарли ташкил этишга халқ таълими муассасалари ҳам алоҳида ҳисса қўшдилар. Масалан, Қўрғонтепа тиббиёт коллежи қошидаги “Соғлом авлод” тўгараги аъзоларининг байрам билан боғлиқ қўл меҳнати намуналари томошабинга ўзгача эстетик завқ бағишлайди. Шаҳрихон туманидаги 7-, 15-мактабгача таълим муассасалари тарбиячилари томонидан мева данаклари, дуккакли экинлар, гил тупроқ ҳамда бошқа бир қатор ашёлар ёрдамида тайёрланган саватдаги нон ҳамда борлиқнинг уйғониши, деҳқончилик юмушлари, экин экиш билан боғлиқ сувенирларни томоша қилган жажжи ўғил-қизлар юрагида меҳнатга, санъатга иштиёқ куртак ёзиши табиий. Асака автомобиль саноати коллежи 3-курс ўқувчиси Дилшодбек Комиловнинг буюк аждодларимиз сиймолари акс этган ёғоч ҳайкалчалари ҳар қандай кишида ҳайрат ва ҳавас уйғотади.