Асака туманидаги “Тантана” тўйхонасида 21 боланинг суннат тўйи ўтказилди

Андижон вилоятининг Асака тумани марказидаги “Тантана” тўйхонасида Асака, Шаҳрихон, Балиқчи ва Олтинкўл туманларидан 21 боланинг суннат тўйи ўтказилди. 

“Халқ билан мулоқот ва инсон манфаатлари йили” Давлат дастури ижроси доирасида вилоят ҳокимлиги, хотин-қизлар қўмитаси, касаба уюшмалари ташкилотлари бирлашмаси, туманлар ҳокимликлари ва қатор ташкилотлар ҳамкорлигида ўтказилган тантанада тўй болаларнинг ота-оналари, қариндош-уруғлари, маҳалла фаоллари, меҳнат фахрийлари, кенг жамоатчилик вакиллари иштирок этди. 

Тўй болалар карнай-сурнай садолари остида кутиб олинди. 

– Ушбу тадбирлар ҳар бир фуқаро давлатимиз ва ҳукуматимиз эътиборида экани, айниқса, ёш авлодга кўрсатилаётган улкан ғамхўрликнинг ёрқин ифодаси бўлмоқда, – дейди Асака тумани ҳокими ўринбосари, туман хотин-қизлар қўмитаси раиси Муқаддас Қурбонова. – Давранинг тўрида миллий либосларда ўтирган болалару уларнинг ота-оналари ва яқинлари юз-кўзидаги қувончни кўриб, шундай меҳри дарё халқ вакили, ёшу кексасини бирдай эъзозлайдиган мустақил давлат фуқароси эканингдан фахрланиб кетасан киши. Буларнинг барчаси истиқлол ва Президентимиз раҳнамолигида амалга оширилаётган маънавий-маърифий ислоҳотлар самарасидир. 

– Маҳмуджонгинамнинг суннат тўйи катта тантана билан ўтаётгани, унда таниқли санъаткорлар иштирок этаётганидан ичимга сиғмай кетаяпман, – дейди Асака тумани Янгиобод маҳалласида яшовчи Майрамхон Охунова. – Бундай тўйни, болагинамга шунча совға берилишини орзу ҳам қилмаганман-да. Болаларимизга кўрсатилаётган алоҳида эътибор ва ғамхўрлик учун давлатимиз раҳбарига, ҳукуматимизга, барча саховатпеша инсонларга миннатдорлик билдираман. 

Болажонларга вилоят ҳокимлиги ва ҳомий ташкилотларнинг совғалари, Халқ банки томонидан ҳисобига 1 миллион сўмдан маблағ қўйилган омонат дафтарчалари топширилди. 

манбаа: uza.uz