Сайёр қабул натижа бермоқда

Мамлакатимизда фуқаролар мурожаатларини кўриб чиқиш масаласида аниқ механизм ишлаб чиқилган бўлиб, унинг таркибида сайёр қабул фаолияти йўлга қўйилди.

Ўзбекистон Республикаси Президентининг Андижон вилоятидаги сайёр қабулида мурожаатлар адолатли кўриб чиқилмоқда. Унда иштирок этган Ўзбекистон Республикаси Президентининг давлат маслаҳатчиси Турсинхон Худойберганов, Ўзбекистон Республикаси Бош прокурорининг ўринбосари Улуғбек Суннатов, ички ишлар вазирининг ўринбосари Алишер Мирзаев ва бошқа мутсаддилар вилоятдан мамлакат Президентининг виртуал қабулхонасига йўлланган мурожаатларнинг ижобий хал этилиши масаласига атрофлича ёндошдилар.

Қўрғонтепа тумани ҳокимлиги биносида бўлиб ўтган қабулда Хонобод шаҳри, Қўрғонтепа, Жалақудуқ, Хўжаобод туманларининг 48 нафар фуқаролари аризалари кўриб чиқилди. Таҳлиллар шуни кўрсатадики, мурожаатларнинг аксарият қисмини уй-жой масаласи, болаларни нафақа пули билан таъминлаш, ички йўлларни таъмирлаш, мактабгача таълим муассасаларини барпо этишдаги муаммолар қамраб олган. Мурожаатлар туман ва шаҳар ҳокимлари, мутасадди идоралар раҳбарлари иштирокида ўрганиб чиқилди ва аксарияти ўз ўрнида ечимини топди.

- Ўнг оёғимга 2000 минг АҚШ доллари қийматидаги протез ўрнатилган, -дейди Пахтаобод туманидан ташриф буюрган фуқаро Нигорахон Комилова.- Чап оёғимга протез қўйдиришда маблағдан қийналяпман. Мана шу масалада ёрдам сўраб мамлакатимиз Президентининг виртуал қабулхонасига мурожаат этгандим. Сайёр қабулда соғлиқни сақлаш бошқармаси ва туман ҳокимлигининг кўмаги билан кредит маблағи ажратиладиган бўлди. Ана шу маблағ эвазига Тошкентдаги нуфузли тиббиёт марказида протез қўйиладиган бўлди. Яратилган бундай имкониятдан хурсандман.